សិង្ហបុរី៖ ម្ចាស់ហាងលក់ផ្លែឈើមួយកន្លែងនៅក្នុងតំបន់ Jurong East ប្រទេសសិង្ហបុរី បានសម្តែងការហួសចិត្តយ៉ាងខ្លាំង បន្ទាប់ពីកាមេរ៉ាសុវត្ថិភាព (CCTV) បានទាក់រូបភាពបុរសម្នាក់ លួចប្រមូលយកធុរេនពូជលំដាប់ខ្ពស់ «បន្លាមាស» (Black Thorn) អស់ចំនួន ៩ ផ្លែ ដែលមានតម្លៃសរុបប្រហែល ២៤០ ដុល្លារសិង្ហបុរី (ស្មើនឹងប្រមាណ ១៨៧ ដុល្លារអាមេរិក)។
ហេតុការណ៍នេះបានកើតឡើងកាលពីទាបភ្លឺ ថ្ងៃអាទិត្យ ទី១៤ ខែមិថុនា ឆ្នាំ២០២៦ វេលាម៉ោងប្រហែល ៣:៤០ នាទី នៅហាង «Hojiak Durian & Fruits» ដែលមានទីតាំងស្ថិតនៅប្លុក ៣៥១ ផ្លូវ Jurong East Street 31។
តាមរយៈវីដេអូដែលម្ចាស់ហាងបានបង្ហោះនៅលើបណ្តាញសង្គមហ្វេសប៊ុក បានបង្ហាញឱ្យឃើញថា បុរសសង្ស័យដែលពាក់អាវយឺតពណ៌បៃតងចាស់ និងខោខ្លី បានដើរមកក្បែរកន្ត្រកធុរេនដ៏ធំមួយនៅខាងមុខហាង។ កន្ត្រកនោះត្រូវបានគ្របដោយផ្ទាំងតង់កៅស៊ូ ប៉ុន្តែនៅមានចន្លោះចំហខ្លះ។ ភ្លាមៗនោះ បុរសដដែលបានទាញផ្ទាំងតង់កៅស៊ូចេញ រួចលបលួចប្រមូលយកផ្លែធុរេនដាក់ចូលក្នុងថង់ផ្លាស្ទិកយ៉ាងរហ័ស មុននឹងដើរចេញទៅដោយសុវត្ថិភាពជាមួយនឹងថង់ធុរេនចំនួន ៣ នៅក្នុងដៃ។
លោក Zhou អាយុ ២៧ ឆ្នាំ ដែលជាម្ចាស់ហាង បានប្រាប់សារព័ត៌មានក្នុងស្រុកថា ដោយសារតែបច្ចុប្បន្នជា រដូវកាលធុរេនហក់ឡើងខ្ពស់ (Peak Season) ហាងរបស់លោកទទួលបានការដឹកជញ្ជូនធុរេនមកយ៉ាងច្រើន សន្ធឹកសន្ធាប់ ហេតុទើបត្រូវតម្រៀបធុរេនខ្លះដាក់ក្នុងកន្ត្រកនៅខាងក្រៅហាង រួចគ្របតង់ចងរឹតការពារ។ លោកបានដឹងថាមានករណីលួចនេះ បន្ទាប់ពីបុគ្គលិកមកបើកហាងនៅពេលព្រឹក ហើយឃើញផ្ទាំងតង់មានសភាពរញ៉េរញ៉ៃ និងមានចន្លោះប្រហោងបាត់ធុរេនអស់មួយចំនួនធំ។
លោក Zhou បានបន្ថែមថា ធុរេនដែលបាត់បង់សុទ្ធសឹងតែជាពូជ Black Thorn ដែលនាំចូលពីប្រទេសម៉ាឡេស៊ី។ លោកថែមទាំងបានចំណាំមុខបុរសរូបនោះច្បាស់ថា ជាអតីតអតិថិជនចាស់ដែលខកខានមកទិញទំនិញនៅហាងរបស់លោកជាងមួយឆ្នាំមកហើយ។
នៅក្នុងការបង្ហោះលើបណ្តាញសង្គម ម្ចាស់ហាងបានសរសេរផ្ញើសារទៅកាន់បុរសរូបនោះបែបកំប្លែងលាយការហួសចិត្តថា៖
«លោកពូ! បើពិតជាគ្មានលុយទិញធុរេនហូបទេ ដើរមកប្រាប់ពួកយើងចុះ ពួកយើងនឹងដួសឱ្យហូបហ្វ្រី។ ឬក៏លោកពូអាចប្រើប្រាស់ប័ណ្ណឧបត្ថម្ភរដ្ឋាភិបាល (CDC Vouchers) មកទិញក៏បានដែរ មិនគួរធ្វើទង្វើខុសច្បាប់បែបនេះឡើយ។ លេងលួចម្តង ៧ ទៅ ៨ ផ្លែបែបនេះ វាមិនហួសហេតុពេកទេឬ?»។
ទោះជាយ៉ាងណា ម្ចាស់ហាងធ្លាប់បានទុកឱកាសឱ្យបុរសរូបនោះត្រឡប់មកទូទាត់ប្រាក់វិញ ដើម្បីបញ្ចប់រឿងដោយសន្តិវិធី ប៉ុន្តែដោយសារគ្មានការឆ្លើយតប លោកក៏បានសម្រេចចិត្តរាយការណ៍ជូនសមត្ថកិច្ច។
យោងតាមការបញ្ជាក់ពីស្នងការដ្ឋាននគរបាលសិង្ហបុរី បានឱ្យដឹងថា ខាងប៉ូលិសបានទទួលពាក្យបណ្តឹងពីករណីលួចនេះរួចរាល់ហើយ ហើយបច្ចុប្បន្នកំពុងធ្វើការស៊ើបអង្កេតយ៉ាងយកចិត្តទុកដាក់ ដើម្បីស្វែងរកខ្លួនជនសង្ស័យមកចាត់ការតាមនីតិវិធីច្បាប់៕
